خطوات أعجبتني في تربية أطفالي..!!

سلام عليكم جميعا....

حبيت أحدثكم عن أمور بسيطه لكنها والله عظيمة الأثر على أبنائك..

نتحدث عنها وحده وحده..

= عودت عيالي من عمر سنه ونص تقريبا..يعني في بدايات خطواته..
لما يتعثر في مشيته أو يصتدم بشيء أو يتألم من أي حادث أو عارض..
إني ما أقوم من مكاني وأتحكم في مشاعر الأمومه وأردد فقط جمله واحده: بسم الله ..بسم الله...

بكذا أعلقهم بالله..ولما يتعرضون لأي إصابه ما يبحثون عن أم تركض لهم ..
مجرد ينطقون البسمله راح ينسون الألم..

حتى كثير لاحظوا ..وحده تقول لي ماشاء الله ولدك طاح من المرجيحة ولا صاح وقال بسم الله ..وولدي عمره سنه و5 شهور..


=عودتهم على السلام...
لما نروح لناس ..ألزم بنتي تسلم ثم تلعب...
وأشجعها واصير لما اسلم اقول للحرمه هذي بنتي فلانه ..تحس بقيمتها وتسلم..
الحين صارت تزززززعل لما يطمرونها ولا يسلمون وتلزمني أروح بها للي ماسلمت عشان تسلم عليها..

بعض الأخوات الله يهديهم تحقر الصغار ولا تسلم عليهم..
أنا من بعد بنتي صرت أحرص عليهم أكثر ..لأنهم يفرحون بالتقدير ويحسون إنهم كبار لهم نظره..

= خصصت لبنتي وعمرها 5 سنوات مصحف وجلال وسجادة على مقاسها..
تحببها في العبادات..ولما أفرش سجاتي أشوفها تجر سجادتها معي..ياويلي أكبر قبل تجهز ..عشان تتابع حركاتي وركعاتي..
وعلمتها إن المصحف ما نقرا فيه قبل نتوضا...وهذا دعاها للتركيز على طريقتي في الوضوء..

= عودتها جزمتها لما تخلعها عند الناس تسندها في مكانها المخصص..
ولو أضطر أقولها ..إذا بترمينها كذا بنرجع لبيتنا عيب نرميها في الطريق أو عند الناس...

= عودتها قبل تنام تسلم على أبوها وتحب يده وراسه..أحب أشوفه مبسوط منها وفخور في فعلها...
وبكذا ألغي الحواجز بينه وبين بنته اللي يخلقها إنشغاله عن البيت..


هذا أشياء بسيطه حبيت أذكركم فيها..
وشكرا ..